ગરબો નવરાતનો

 ગરબો નવરાતનો

(રાગ - લોકગીત -ઢાળ, તાલ - દાદરા)

ચેતનની ચંદ્રિકાઓ ચમકે,

અનંત-જ્યોત ઝબકે,

                             રે..... ઘૂમે ગરબો નવરાતનો.....ગરબો નવરાતનો..... 1

નભની નિહારિકાને હાટે,

વિરાટ-વ્યોમ વાટે,

                           રે..... ઘૂમે ગરબો નવરાતનો.....ગરબો નવરાતનો..... 2

ધખધખતી ધરતી હૈયે હેમંત થઇ,

વર્ષા હરસી વરસી તરસી દિગંત મહીં,

અંબર અટારીઓને લીંપી,

શરદ શુભ્ર દીપી,

                      રે.... ઘૂમે ગરબો નવરાતનો.....ગરબો નવરાતનો..... 3

વનવનને ઉપવનમાં વિકસે કૈં વલ્લરિ,

મંદમંદ સુગંધ વહે બંધ પુષ્પની કળી,

અવનિની ઓઢણી રંગાતી,

મસ્તીમાં મદમાતી,

                        રે..... ઘૂમે ગરબો નવરાતનો.....ગરબો નવરાતનો..... 4

યુગમાતા અંબા ગરબે રમવા આવતાં,

મંગલ ૐકાર તણા ઝંકાર જગાવતાં,

ગરબા, ગાયત્રી, છંદ ગાતાં

હવન .... હોમ.... થાતાં,

                        રે..... ઘૂમે ગરબો નવરાતનો.....ગરબો નવરાતનો..... 5

આતમનાં ઓજસ પરમાતમને પ્રેરતાં,

અંતરના જંતર મધુર સૂર રેલતાં,

આશાના ઓથ અવિનાશી,

રેલાય .... રંગ રાશિ,

                        રે..... ઘૂમે ગરબો નવરાતનો.....ગરબો નવરાતનો..... 6

મનના મનોરથની મંજરીઓ મ્હોરતી,

કુંજ કુંજ જીન્દગીને રસવસંત ફોરતી,

ભક્તિ-ગંગાના નીરે ન્હાતાં,

                       રે..... ઘૂમે ગરબો નવરાતનો.....ગરબો નવરાતનો..... 7

 

કવિ – રવિ ઉપાધ્યાય,

( ઉરના સૂર અને નવરાત્ર નિર્ઝરિણિમાં પ્રકાશિત)