અમારી આઝાદી…

 સુપ્રસિધ્ધ “મુંબઇ સમાચાર” અખબારે શનીવાર,તારીખ 26 જાન્યુઆરી 1957ના રોજ ભારત દેશના “પ્રજાસત્તાક દિવસ”ની 7મી વર્ષગાંઠના અવસર પર બહાર પાડેલ આવૃતિમાં કવિ : રવિ ઉપાધ્યાયની આ શબ્દરચના પ્રકાશિત કરી હતી.1947માં દેશ આઝાદ તો થયો પણ હજુ 1957માં આબાદ નથી થયો એ વાતનો રંજ પ્રગટ થયો છે. આ સાથે સાથે આઝાદીનું મૂલ્ય દેશવાસીઓને પ્રાણથી પણ વધું છે અને એનું યોગ્ય જતન થશે તો આખું વિશ્વ એક દિવસ એની જાહોજલાલીથી આશ્ચર્ય ચકિત થશે એવો આશાવાદ અને વિશ્વાસ દર્શાવ્યો છે.

ભલે સુખચેનથી જીવનતણી માણી ન ખુશાલી

ભલે કૈં સેંકડો સંકટ તણા વિષની પીધી પ્યાલી !

ભલે છે દૂર મંઝીલ ને ભલે રહી દૂર આબાદી

છતાં છે પ્રાણથી પ્યારી અમોને ” દેશ-આઝાદી”…!…1 

ભલે દુનિયા બધી વર્ષાવતી ખંજર મુશીબતનાં,

સહી લેશું સીતમ જખ્મો, દઇ મંત્રો મહોબ્બતના !

ભલે આધિ અને વ્યાધિ બધે અમ પર રહી લાધી,

છતાં છે પ્રાણથી પ્યારી અમોને ” દેશ-આઝાદી”…!…2 

હજૂ આઝાદીનું આ વૃક્ષ છે નાનું અને વાંકુ

કહો ક્યાંથી શકે અર્પી હજૂ એ ફળ મીઠું પાકું !

પછી દુનિયા નિહાળે છો, વિકટ હાલતમાં બરબાદી  

છતાં છે પ્રાણથી પ્યારી અમોને ” દેશ-આઝાદી”…!…3 

અમારી આત્મશ્રધ્ધાથી જગાવીશું નવો પલ્ટો

જહાંના પંથથી ન્યારો રચાવીશું નવો રસ્તો !

લખી ઇતિહાસને પાને શહાદતની અમે યાદી –  

છતાં છે પ્રાણથી પ્યારી અમોને ” દેશ-આઝાદી”…!…4 

નક્કી દિન આવશે એવો જહાં જ્યારે ચકિત થાશે

અમારી કીર્તિ ગાથાઓ તણાં ગૌરવ-ગીતો ગાશે…

ગુલામી વિશ્વની ટાળી રચીશું વિશ્વ-આબાદી

અમોને પ્રાણથી પ્યારી અમારી ” દેશ-આઝાદી”…!…5 

હજૂ છે નાવ મઝધારે જવું છે દૂર કિનારે

ભલે તોફાન છે ભારે છતાં કૈં ડર ન લગારે….!

દૂવા “બાપુ” તણી સાથી, ” જવાહર” ટાળશે આંધી !

અમોને પ્રાણથી પ્યારી અમારી  ” દેશ-આઝાદી”…!…6 

કવિ : રવિ ઉપાધ્યાય, (કવિનાં” ઉરનાં સૂર” નામે કાવ્યસંગ્રહ અને સુપ્રસિધ્ધ અખબાર “મુંબઇ સમાચારે”શનીવાર,તારીખ 26 જન્યુઆરી 1957ના રોજ ભારત દેશના “પ્રજાસત્તાક દિવસ”ની 7મી વર્ષગાંઠના અવસર પરબહાર પાડેલ આવૃતિમાં પ્રકાશિત…..)